“မပါဝင်ချင်တဲ့သူကို အတင်းမခေါ်ပါဘူး၊ ပါဝင်ချင်တဲ့သူကိုပဲ လက်တွဲခေါ်ပြီးတော့၊ ဘယ်လူမျိုး၊ ဘယ်ပုဂ္ဂိုလ် မဆို လက်တွဲခေါ်ဖို့အဆင်သင့်ပါပဲ”
အမျိုး ဘာသာ သာသနာ စောင့်ရှောက်ရေးအဖွဲ့ (ဗဟို)ဥက္ကဋ္ဌ အင်းစိန်ရွာမဆရာတော်ကြီး ဘဒ္ဒန္တတိလောကာ ဘိဝံသထံ လျှောက်ထားခြင်း
ပြီးခဲ့တဲ့ ဇန်န၀ါရီ ၁၃-ရက်က သီတဂူကမ္ဘာ့ဗုဒ္ဓတက္ကသိုလ်ရဲ့ စီမံအုပ်ချုပ်ရေးအဖွဲ့ရဲ့ ဥက္ကဋ္ဌအဖြစ်သာ တာဝန် ထမ်းဆောင်နေပြီး အခြားဘာသာရေးအသင်းအဖွဲ့၊ လူမှုရေးအဖွဲ့၊ နိုင်ငံရေးအဖွဲ့တွေမှာမ ဥက္ကဋ္ဌ၊ ဒုဥက္ကဋ္ဌ တာဝန်ထမ်းဆောင်ခြင်းမရှိဘူးဆိုတဲ့ ကြေညာချက်တစ်စောင် ထုတ်ပြန်လိုက်ပါတယ်။ အဲဒီကြေညာချက်နဲ့ပတ် သတ်လို့ အမျိုး ဘာသာ သာသနာ စောင့်ရှောက်ရေးဗဟိုအဖွဲ့ (မဘသ)ရဲ့ ဥက္ကဋ္ဌတာဝန်ကိုယူထားတဲ့ အင်းစိန် ရွာမဆရာတော်ကြီး ဘဒ္ဒန္တတိလောကာဘိဝံသကို မြန်မာပို့စ်က သွားရောက်လျှောက်ထား မေးမြန်းခဲ့ပါတယ်။
--------------------------------------
-----------------------------------------------------------------------------------------
မေး။ အမျိုး ဘာသာ သာသနာ စောင့်ရှောက်ရေးအဖွဲ့မှာ သီတဂူဆရာတော်ကြီးက ဒုတိယဥက္ကဋ္ဌတာဝန်ယူ ထားယ်ဆိုတာ ဟုတ်ပါသလားဘုရား။
ဖြေ။ ဟုတ်ပါတယ်။ အမျိုး ဘာသာ သာသနာ စောင့်ရှောက်ရေးအဖွဲ့ကို ဖွဲ့ကာစကတည်းက ဆရာတော်အချို့ က သီတဂူဆရာတော်ထံ သွားရောက်လျှောက်ထားတာလေ၊ သီတဂူဆရာတော်ထံ သွားလျှောက်တာ၊ သူက အလုပ်များလို့ အင်းစိန်ရွာမဆရာတော်ကြီးကို ဦးဆောင်ခိုင်းလိုက်ဆိုပြီး မိန့်တယ်။ အဲတာနဲ့ သွားလျှောက်တဲ့ ဆရာတော်တွေကလည်း သူခိုင်းတဲ့အတိုင်း ဆရာတော်က ဥက္ကဋ္ဌတာဝန်ယူခဲ့ပါတယ်။ မဘသစတင်ဖွဲ့စည်းတဲ့ အချိန်မှာလည်း သူကိုယ်တိုင်တက်ရောက်ပြီးတော့ သြ၀ါဒတွေပေးတယ်၊ ညွှန်ကြားချက်တွေလည်းပေးတယ်၊ လမ်းညွှန်မှုတွေပေးတယ်၊ သူကိုယ်တိုင်လည်း ဒုဥက္ကဋ္ဌရာထူးကို လက်မှတ်ထိုးပြီး ယူထားတယ်။ ဆက်လက်ပြီး တော့လည်း ဖွဲ့စည်းပြီးတဲ့အချိန်ကစပြီး အခုအချိန်ထိအောင် သူညွှန်ကြားတာနဲ့ ဆရာတော်တို့နဲ့ ကွဲလွဲချက် ဘာတစ်ခုမှမရှိဘူး။ အယူအဆ ကွဲလွဲမှုလည်းမရှိဘူး။ ဆက်လက်ပြီးတော့လည်း သူကတော့အလုပ်များတော့ ဆက်သွယ်ရုံပဲရှိတယ်။
နောက်ဒီလုပ်ငန်းတွေကို ဆက်မလုပ်တော့ဘူး။ ဒီအဖွဲ့တို့က နှုတ်ထွက်တယ်ဆိုတာလည်း ဆရာတော်တို့ကို အကြောင်းကြားတာမရှိဘူး၊ သူမလုပ်တော့ပါဘူးဆိုတဲ့ သဘောမျိုးပြောတာမရှိဘူး။ အခုသူ့ရဲ့ကြေညာချက် ထွက်လာတဲ့အခါကြတော့ ဆရာတော်တို့ မဘသနဲ့မပတ်သတ်ဘူးလို့ တိုက်ရိုက်တော့မပြောထားဘူး၊ ဒါပေမဲ့ အခြားအဖွဲ့အစည်းတွေမှာ ပါဝင်ခြင်းမရှိဘူးလို့ သူတို့ရဲ့ သီတဂူအုပ်ချုပ်ရေးအဖွဲ့ကနေပြီးတော့ ကြေညာတာ လေ၊ အဲတော့ ဆရာတော်တို့က သီတဂူဆရာတော် မဘသအဖွဲ့နဲ့ အကြောင်းအကျိုးမညီညွတ်လို့ တာဝန်မယူ သည့်တိုင်အောင် ဆက်လက်ပြီး သူနဲ့ညှိနှိုင်းတိုင်းပင်ဆောင်ရွက်သွားဖို့ ရှိပါတယ်။ သီတဂူဆရာတော်က နှုတ် ထွက်တယ်လို့လည်း မပြောပါဘူး၊ အခုလက်ရှိ သီတဂူဆရာတော်ရဲ့ ကြေညာချက်ထုတ်ရတဲ့ အရင်းအမြစ် အခြေအနေကိုတော့ ဆရာတော်တို့က တိတိကျကျ ဂဃနဏ မသိရဘူး၊ ဆရာတော်တို့ဆီကို အကြောင်းကြား ပြီး နှုတ်ထွက်တာတော့ မရှိခြင်းကြောင့် ဆရာတော်တို့ကလည်း သူ့ကိုဦးထိပ်ထားလုပ်တယ်။ ဒီမှာ တာဝန်မယူ သည့်တိုင်အောင် သူ့ကို ဆက်လက်ညှိနှိုင်းတိုင်ပင် ဆောင်ရွက်သွားဖို့ရှိပါတယ်။
-----------------------------------------------------------------------------------------
မေး။ သီတဂူဆရာတော်ကြီးက မဘသအဖွဲ့မှာတာဝန်ယူဖို့ လက်ခံထားတာမရှိသေးဘူးလို့ ပြောနေတာရှိပါ တယ်။ တာဝန်ပေးဖို့ လာလျှောက်တာတော့ရှိတယ်လို့ ပြောနေတဲ့အပေါ် ဥက္ကဋ္ဌဖြစ်တဲ့ ဆရာတော်က ဘယ်လို မှတ်ချက်ပြုချင်ပါသလဲဘုရား၊
ဖြေ။ ပထမစတင်ဖွဲ့စည်းကတည်းက ဒုဥက္ကဋ္ဌတာဝန်ကို သီတဂူဆရာတော်က တာဝန်ယူထားတယ်၊ သီတဂူ ဆရာတော်ကိုယ်တိုင် လက်မှတ်ရေးထိုးပြီးတော့ ဒုဥက္ကဋ္ဌတာဝန်ကိုယူတာပါ။ ဒါပဲလေ၊ ယူထားတယ်ဆိုတာ အမှန်ပဲလေ၊ သူလက်မှတ်ထိုးယူထားတာလေ၊ သူလက်မှတ်ထိုးယူထားတာလည်း ဆရာတော်တို့ဆီမှာရှိတယ်။
-----------------------------------------------------------------------------------------
မေး။ သီတဂူဆရာတော်ကြီးက အခုလိုကြေညာချက်ထုတ်တဲ့အပေါ် ဘယ်လိုမှတ်ချက်ပြုချင်ပါသလဲဘုရား။
ဖြေ။ အဲဟာကတော့ သူ့ရဲ့ဆုံးဖြတ်ချက်ကို ဆရာတော်တို့က ဘယ်သိမလည်း၊ ခုနက ပြောလိုက်သလိုပဲ၊ သူရဲ့ လက်တလောအခြေအနေအရ ကြေညာချက်ထုတ်ရတာ ဖြစ်ကောင်းဖြစ်ပါလိမ့်မယ်။
-----------------------------------------------------------------------------------------
မေး။ တင်ပါ့ဘုရား။ ဆရာတော်တို့နဲ့ သီတဂူဆရာတော်ကြီးတို့ ပူးပေါင်းလုပ်ဆောင်ခဲ့တဲ့ အချက်တစ်ချက် လောက် ဥပမာအနေဖြင့် မိန့်ကြားပေးပါဘုရား။
ဖြေ။ များသောအားဖြင့် သူနဲ့တွေ့တိုင်း တွေ့တိုင်းမှာ များသောအားဖြင့်အားပေးတယ်၊ လိုအပ်တာကိုလည်း တင်ပြပေးတယ်။ သီတဂူဆရာတော်ကတော့ မအားတာများတော့ လက်တလော ဆရာတော်တို့အဖွဲ့မှာတော့ လာမလုပ်နိုင်ဘူးပေါ့။ လိုအပ်ရင်တော့ ဖုန်းဆက်ပြီးအကြောင်းကြားတာကို ဆရာတော်တို့က ဆောင်ရွက်နိုင်သ လောက် ဆောင်ရွက်ပေးပါတယ်။
-----------------------------------------------------------------------------------------
မေး။ ဆရာတော်တို့ အမျိုး ဘာသာ သာသနာ စောင့်ရှောက်ရေးအဖွဲ့ရဲ့ လက်ရှိတာဝန်ယူမှု လုပ်ဆောင်မှုများ ကို မိန့်ကြားပေးပါဘုရား။
ဖြေ။ ဥက္ကဋ္ဌကို ဆရာတော်က တာဝန်ယူတယ်၊ ဒုဥက္ကဋ္ဌက ၃-ပါးရှိတယ်။ သီတဂူဆရာတော်ရယ်၊ ဇွဲကပင်ဆရာ တော်ရယ်၊ မကွေးဆရာတော်ရယ် ၃-ပါးတာဝန်ယူထားပါတယ်။ အကျိုးဆောင်တာဝန်ကိုလည်း ၃-ပါး၊ ၄-ပါးရှိပါ တယ်။
-----------------------------------------------------------------------------------------
မေး။ ဆရာတော်တို့က အမျိုး ဘာသာ သာသနာအတွက် လုပ်ဆောင်နေပါတယ်။ ဒါပေမဲ့ အဖွဲ့ဝင်အချို့က တရားစီရင်ရေးမဏ္ဍိုင်အပေါ် ၀င်ရောက်စွက်ဖက်မှုရှိတယ်လို့ ဝေဖန်နေပါတယ်။ ဒါကိုဆရာတော်ဘုရားက ဘယ်လိုထိန်းသိမ်း သြ၀ါဒပေးဖို့ရှိပါသလဲဘုရား။
ဖြေ။ တရာစီရင်ရေးအပေါ်တို့ကို ၀င်ရောက်စွက်ဖက်မှုမရှိပါဘူး။ တရားရုံးတွေမှာ သက်ဆိုင်ရာပုဂ္ဂိုလ် တာဝန်ရှိ တဲ့သူတွေကို သွားအားပေးတာရှိပါတယ်။ သူတို့စွပ်စွဲသလို ၀င်ရောက်စွက်ဖက်တာ ဘာမှမရှိပါဘူး။
-----------------------------------------------------------------------------------------
မေး။ မဘသအဖွဲ့ကို နိုင်ငံတော်သံဃမဟာနာယကအဖွဲ့ (မဟန)ကလည်း အသိအမှတ်ပြုလိုက်ပြီ၊ ဒါအပြင် နိုင်ငံတော်သမ္မတကလည်း အမျိုးစောင့်ဥပဒေပြဋ္ဌာန်းပေးဖို့ လက်မှတ်ရေးထိုးပေးလိုက်ပြီ ဖြစ်တဲ့အတွက် ဆရာ တော်တို့က အမျိုး ဘာသာ သာသနာအတွက် ဆက်လက်ဆောင်ရွက်မဲ့ ရည်မှန်းချက်ကို ပြည်သူအားလုံး သိရအာင် မိန့်ကြားပေးပါဘုရား။
ဖြေ။ ဆရာတော်တို့အဖွဲ့က နိုင်ငံရေးရည်ရွယ်ချက်လည်းမရှိဘူး၊ တို့နိုင်ငံအတွင်းက ပါတီတို့ အစိုးရတို့ကိုလည်း တိုက်ခိုက်ဖို့ဆန္ဒမရှိဘူး၊ ဘာသာခြား, လူမျိုးခြားကိုလည်း တိုက်ခိုက်ဖို့ရည်ရွယ်ချက်မရှိဘူး။ ကိုယ့်လူမျိုး ကိုယ့် ဘာသာ ကိုယ့်သာသနာအတွက် လိုအပ်တဲ့ဘက်ကနေ လမ်းညွှန်ပေးတယ် စောင့်ရှောက်ပေးတယ်ဆိုတဲ့ နည်းလမ်းညွှန်ပေးတယ်။ ကူညီပေးတယ် အဲဒီသဘောပဲရှိတယ်။ သူများကို သွားတိုက်ခိုက်တာလည်း မရှိဘူး၊ သူများတွေအမြင်မှာတော့ တစ်မျိုးမြင်လိမ့်မယ်၊ ဆရာတော်တို့ရည်ရွယ်ချက်က ဘယ်သူမှတိုက်ခိုက်ဖို့မဟုတ် ဘူး၊ ကိုယ့်ဘာသာ ကိုယ့်သာသနာအတွက် ထိုက်သင့်သလောက် ကူညီပေးဖို့ပဲဖြစ်တယ်၊ ဆရာတော်တို့အဖွဲ့ က ဆရာတော်တွေ၊ သံဃာတော်တွေ လူပုဂ္ဂိုလ်တွေ စုပေါင်းပြီးတော့ ဖွဲ့စည်းထားတဲ့ အဖွဲ့အစည်းဖြစ်တယ်။ ဘာသာအဖွဲ့အစည်းဆိုတာ ဘာမှမှတ်ပုံတင်စရာလည်း မလိုတဲ့အဖွဲ့အစည်းပါ။ အဲဒီအတွက် သံဃာ့စည်းမျဉ်းနဲ့ လည်း မညီစရာအကြောင်းမရှိဘူး။ ဆရာတော်, သံဃာတော်တွေကိုလည်း ဦးထိပ်ထားပြီးလုပ်တာမှန်တယ်၊ မပါဝင်ချင်တဲ့သူကို အတင်းမခေါ်ပါဘူး။ ပါဝင်ချင်တဲ့သူကိုပဲ လက်တွဲခေါ်ပြီးတော့ ဘယ်လူမျိုး ဘယ်ပုဂ္ဂိုလ်မဆို လက်တွဲခေါ်ဖို့ အဆင်သင့်ပါပဲ။ ကိုယ့်ရဲ့ အမျိုး ဘာသာ သာသနာအတွက် အခုအချိန်မှာ လိုအပ်နေတဲ့ဘက်က တစ်ထောင့်တစ်နေရာက ဖြည့်ဆည်းပေးတဲ့သဘောပါပဲ။
-----------------------------------------------------------------------------------------
မေး။ နောက်ဆုံးမှာကြားချင်တာ မိန့်ကြားပေးပါဘုရား။
ဖြေ။ ဘယ်သူ့ကိုမှ လက်မတွဲနိုင်စရာအကြောင်းမရှိဘူး။ တိုင်းပြည်နှင့် လူမျိုးအတွက်ကို လက်တွဲပြီးလုပ်ဖို့ လည်းရှိတယ်။ ဆရာတော်တို့က နိုင်ငံရေးအတွက် ၀င်လုပ်တာလည်းမဟုတ်ဘူး။ အာဏာရရေးအတွက်လည်း ၀င်လုပ်တာလည်းမဟုတ်ဘူး၊ ဘယ်သူမဆို ကိုယ့်အပေါ်တိုက်ခိုက်လာတဲ့ ပုဂ္ဂိုလ်တွေကိုလည်း သည်းခံခွင့်လွတ်ပါတယ်။
-----------------------------------------------------------------------------------------
(Arkar)
No comments:
Post a Comment