သဘောထား ထုတ်ပြန်ချက်
--------------------------------------------------
၁။ ရန်ကုန်တိုင်းဒေသကြီး ဝန်ကြီးချုပ် ဦးဖြိုးမင်းသိန်းသည် စင်္ကာပူနိုင်ငံ၊ ရန်ကုန်လေဆိပ်နှင့် ကမ္ဘာအေး သာသနာရေးဋ္ဌာနတို့၌ ယခုနှစ် ဇူလိုင်လ ၃-ရက်၊ ၆-ရက်နှင့် ၇-ရက်နေ့များတွင် ရန်ကုန်တိုင်းဝန်ကြီးချုပ်တစ်ဦး၏ လုပ်ပိုင်ခွင့် မူဘောင်ကိုကျော်လွန်၍''မြန်မာနိုင်ငံလုံးဆိုင်ရာ အမျိုး ဘာသာ သာသနာ စောင့်ရှောက်ရေး (မဘသ)အဖွဲ့ ကြီး''ကို ပျက်စီးစေရန် ရည်ရွယ်ချက်ရှိရှိ ကြံစည်အားထုတ်မှုကို ပြင်းထန်စွာရှုတ်ချသည်။
-------------------------------------------------
၂။ အမျိုး ဘာသာ သာသနာ စောင့်ရှောက်ရေး(မဘသ)အဖွဲ့သည်
(က) ၂ဝ၁၄-ခု၊ ရန်ကုန်မြို့၊ မရမ်းကုန်းမြို့နယ်၊ ကမ္ဘာအေးသာသနာရေးဋ္ဌာန၊ မဟာပါသာဏ လိုဏ်ဂူ တော်ကြီး၌ ကျင်းပသော ဂိုဏ်းပေါင်းစုံ သံဃာ့ညီလာခံကြီးမှ ပေါက်ဖွားလာခြင်းဖြစ်သည်။
(ခ) နိုင်ငံတော်သံဃမဟာနာယက (မဟန) အဖွဲ့၏ သံဃနာယကလက်စွဲပါ သံဃအဖွဲ့အစည်း အခြေခံ စည်းမျဉ်း (သံ/စည်း) လုပ်ထုံးလုပ်နည်းများနှင့်လည်း ညီညွတ်သည့် အဖွဲ့အစည်းကြီး ဖြစ်သည်။
(ဂ) ၂ဝဝ၈-ခု နိုင်ငံတော်ဖွဲ့စည်းပုံ အခြေခံဥပဒေ အခန်း(၈)၊ နိုင်ငံသား၊ နိုင်ငံသားများ၏ မူလအခွင့်အရေး နှင့် တာဝန်များကဏ္ဍလာ ပုဒ်မ ၃၅၄-အပိုဒ်(ဂ) အသင်းအဖွဲ့(သို့မဟုတ်) အစည်းအရုံးများ ဖွဲ့စည်း ဆောင်ရွက်ခွင့် ဥပဒေနှင့်လည်း ညီညွတ်သည့် အဖွဲ့အစည်းကြီး ဖြစ်သည်။
(ဃ) ပြည်ထောင်စုလွှတ်တော် ဥပဒေအမှတ် ၃၁/၂ဝ၁၄ အသင်းအဖွဲ့များ မှတ်ပုံတင်ခြင်းဆိုင်ရာ ဥပဒေနှင့်လည်း ညီညွတ်သည့် အဖွဲ့အစည်းကြီး ဖြစ်သည်။
------------------------------------------------------------
၃။ နိုင်ငံတော်သံဃမဟာနာယက(မဟန) အဖွဲ့သည် သံဃာတော်များ သီးသန့်ဖွဲ့စည်းထားသော ''အာဏာပိုင် သံဃအဖွဲ့'' ဖြစ်သည်။ အမျိုး ဘာသာ သာသနာ စောင့်ရှောက်ရေး(မဘသ)အဖွဲ့သည် ရဟန်းပုဂ္ဂိုလ်, လူပုဂ္ဂိုလ်တို့ စုပေါင်းဖွဲ့စည်းထားသော (အစိုးရမဟုတ်သော) ''သာသနာပြု အဖွဲ့ကြီး'' ဖြစ်သည်။ ထိုနှစ်ဖွဲ့လုံးသည် တိုင်းပြည်နှင့် သာသနာအတွက် အလွန်အရေးပါသောကြောင့် နောက်မဆုတ်တမ်း ကာကွယ် စောင့်ရှောက်သွားမည်ဖြစ်သည်။
------------------------------------------------------------
၎။ ''မဘသအဖွဲ့ မလိုအပ်ပါ''ဟု ပြောကြားခဲ့သော ရန်ကုန်တိုင်းဒေသကြီးဝန်ကြီးချုပ် ဦးဖြိုးမင်းသိန်းနှင့်ပတ်သက်၍ တာဝန်ယူဖြေရှင်းပေးရန် နိုင်ငံတော်သမ္မတဦးထင်ကျော်နှင့် နိုင်ငံတော်၏အတိုင်ပင်ခံပုဂ္ဂိုလ် ဒေါ်အောင်ဆန်းစုကြည် ထံသို့ အမျိုး ဘာသာ သာသနာ စောင့်ရှောက်ရေး (မဘသ)အဖွဲ့မှ မေတ္တာရပ်ခံလွှာ ပေးပို့သွားမည်။
------------------------------------------------------------
၅။ ''ဆရာတော်တို့ထံမှာ သြဝါဒခံယူပါတယ်ဘုရား၊ လိုအပ်လို့ တပည့်တော်တို့ကိုခေါ်ရင် အပြေးအလွှား လာခဲ့ပါ့မယ်ဘုရား''ဟု အမျိုး ဘာသာ သာသနာ စောင့်ရှောက်ရေး ဗဟိုဦးဆောင်ဆရာတော်များအား လျှောက်ထားခဲ့သော နာယကကြီး သူရဦးတင်ဦး (အမျိုးသားဒီမိုကရေစီ အဖွဲ့ချုပ်ပါတီ)သို့ မေတ္တာရပ်ခံလွှာ ပေးပို့သွားမည်။
------------------------------------------------------------
၆။ နိုင်ငံတော်အစိုးရ တာဝန်ရှိသူများသည် ရန်ကုန်တိုင်းဒေသကြီးဝန်ကြီးချုပ် ဦးဖြိုးမင်းသိန်း၏ အမျိုး ဘာသာ သာသနာကို ကာကွယ်စောင့်ရှောက်နေသော မဘသအဖွဲ့အစည်းကြီးအပေါ် မလိုမုန်းထား ရန်ငြိုးပွား၍ မတရား ကြံစည်အားထုတ်နေမှုများကို ၂ဝ၁၆-ခု၊ ဇူလိုင်လ ၁၄-ရက်နောက်ဆုံးထား၍ တာဝန်ယူဖြေရှင်းပေးရန် လေးနက်စွာ တောင်းဆိုလိုက်သည်။
ဘဒ္ဒန္တတိလောကာဘိဝံသ
ဥက္ကဋ္ဌ၊ မဘသအဖွဲ့ (ဗဟို)
အဂ္ဂမဟာပဏ္ဍိတ၊ နိုင်ငံတော်သြဝါဒါစရိယ
ရွာမပရိယတ္တိစာသင်တိုက်၊ အင်းစိန်။
No comments:
Post a Comment